Buradol

An buradol (Esp., volador, "naglalayog") sarong pinapalupad na kawatan na ini may pakpak na pandakop sa hoyop kan duros ngane siya tumaas. An buradol binibilog kan pakpak, turos, ikog kun kaipohan kaagan, asin pwede may sadit na moton o kawit. Ini gibo sa pinahimpis na bala' nin kawayan asin hinahaklopan nin papel (papel de Hapon parati) o magianon asin mahimpison na tela. Ini inaapod man na saranggola alagad an siring mas pusog kisa kan sinasabing sapi-sapi. An pagtaas sa ayre kan buradol gibo kan duros na napalibot sa pakpak kaini; an duros sa irarom mas makusog an presyon sa pagtolod kisa kan duros sa ibabaw kan pakpak na mas maluya an presyon.

An sinasabing pampurok na saranggola ginagamitan nin turos na pinulotan nin dinokdok na bintig an apod "bidriyo" (Esp. vidrio, salming) na kayang gumotgot (magkapagot) sa turos kan kalaban. An buradol man pwedeng takodan nin pidasong langkoy kan buri o niyog na inaapod na "sumba" nakabalagbag sa lakbang kan saiyang pakpak o sa may bandang ikog. Ini makusog an hagonghong pagtinatamaan nin duros. Napapaburu-bago an "bura" kan sumba depende sa desenyo kaini.

An buradol ginigibo man sa iba-ibang porma asin itsura, siring kan hitsura nin gamgam, kulibangbang, hitsurang kahon, hitsurang sira,hitsurang maskara, hitsurang dragon o bakunawa, asibp. saka pinapatos sa maraborab o makolor na haklop kun gusto makaagaw nin atensyon.